Shri Stuti
- Sanskrit
- English
ॐ ।। श्रीस्तुती ॥
मानातीतप्रथितविभवां मङ्गलं मङ्गलानां वक्षःपीठं मधुविजयिनो भूषयन्तीं स्वकान्त्या ।
प्रत्यक्षानुश्रविकमहिमप्रार्थिनीनां प्रजानां श्रेयोमूर्तिं श्रियमशरणस्त्वां शरण्यां प्रपद्ये ॥ १॥
आविर्भावः कलशजलधावध्वरे वाऽपि यस्याः स्थानं यस्याः सरसिजवनं विष्णुवक्षःस्थलं वा ।
भूमा यस्या भुवनमखिलं देवि दिव्यं पदं वा स्तोकप्रज्ञैरनवधिगुणा स्तूयसे सा कथं त्वम् ॥ २॥
स्तोतव्यत्वं दिशति भवती देहिभिः स्तूयमाना तामेव त्वामनितरगतिः स्तोतुमाशंसमानः ।
सिद्धारम्भः सकलभुवनश्लाघनीयो भवेयं सेवापेक्षा तव चरणयोः श्रेयसे कस्य न स्यात् ॥ ३॥
यत्सङ्कल्पाद्भवति कमले यत्र देहिन्यमीषां जन्मस्थेमप्रलयरचना जङ्गमाजङ्गमानाम् ।
तत्कल्याणं किमपि यमिनामेकलक्ष्यं समाधौ पूर्णं तेजः स्फुरति भवतीपादलाक्षारसाङ्कम् ॥ ४॥
निष्प्रत्यूहप्रणयघटितं देवि नित्यानपायं विष्णुस्त्वं चेत्यनवधिगुणं द्वन्द्वमन्योन्यलक्ष्यम् ।
शेषश्चित्तं विमलमनसां मौलयश्च श्रुतीनां सम्पद्यन्ते विहरणविधौ यस्य शय्याविशेषाः ॥ ५॥
उद्देश्यत्वं जननि भजतोरूज्झितोपाधिगन्धं प्रत्यग्रूपे हविषि युवयोरेकशेषित्वयोगात् ।
पद्मे पत्युस्तव च निगमैर्नित्यमन्विष्यमाणो नावच्छेदं भजति महिमा नर्तयन मानसं नः ॥ ६॥
पश्यन्तीषु श्रुतिषु परितः सूरिवृन्देन सार्धं मध्येकृत्य त्रिगुणफलकं निर्मितस्थानभेदम् ।
विश्वाधीशप्रणयिनी सदा विभ्रमद्यूतवृत्तौ ब्रह्मेशाद्या दधति युवयोरक्षशारप्रचारम् ॥ ७॥
अस्येशाना त्वमसि जगतः संश्रयन्ती मुकुन्दं लक्ष्मीः पद्मा जलधितनया विष्णुपत्नीन्दिरेति ।
यन्नामानि श्रुतिपरिपणान्येवमावर्तयन्तो नावर्तन्ते दुरितपवनप्रेरिते जन्मचक्रे ॥ ८॥
त्वामेवाहुः कतिचिदपरे त्वत्प्रियं लोकनाथं किं तैरन्तःकलहमलिनैः किञ्चिदुत्तीर्य मग्नैः ।
त्वत्सम्प्रीत्यै विहरति हरौ सम्मुखीनां श्रुतीनां भावारूढौ भगवति युवां दम्पती दैवतं नः ॥ ९॥
आपन्नार्तिप्रशमनविधौ बद्धदीक्षस्य विष्णोराचख्युस्त्वां प्रियसहचरीमैकमत्योपपन्नाम् ।
प्रादुर्भावैरपि समतनुः प्राध्वमन्वीयसे त्वं दूरोत्क्षिप्तैरिव मधुरता दुग्धराशेस्तरङ्गे ॥ १०॥
धत्ते शोभां हरिमरकते तावकी मूर्तिराद्या तन्वी तुंगस्तनभरनता तप्तजाम्बूनदाभा ।
यस्यां गच्छन्त्युदयविलयैर्नित्यमानन्दसिन्धा- विच्छावेगोल्लसितलहरीविभ्रमं व्यक्तयस्ते ॥ ११॥
आसंसारं विततमखिलं वाङ्मयं यद्विभूतिर्यद्भ्रूभङ्गात्कुसुमधनुषः किङ्करो मेरूधन्वा ।
यस्यां नित्यं नयनशतकैरेकलक्ष्यो महेन्द्रः पद्मे तासां परिणतिरसौ भावलेशैस्त्वदीयैः ॥ १२॥
अग्रे भर्तुः सरसिजमये भद्रपीठे निषण्णामम्भोराशेरधिगतसुधासम्प्लवादुत्थितां त्वाम् ।
पुष्पासारस्थगितभुवनैः पुष्कलावर्तकाद्यैः क्लृप्तारम्भाः कनककलशैरभ्यषिञ्चन्गजेन्द्राः ॥ १३॥
आलोक्य त्वाममृतसहजे विष्णुवक्षःस्थलस्थां शापाक्रान्ताः शरणमगमन्सावरोधाः सुरेन्द्राः ।
लब्ध्वा भूयस्त्रिभुवनमिदं लक्षितं त्वत्कटाक्षैः सर्वाकारस्थिरसमुदयां सम्पदं निर्विशन्ति ॥ १४॥
आर्तत्राणत्रव्रतिभिरमृतासारनीलाम्बुवाहै- रम्भोजानामुषसि मिषतामन्तरङ्गैरपाङ्गै ।
यस्यां यस्यां दिशि विहरते देवि दृष्टिस्त्वदीया तस्यां तस्यामहमहमिकां तन्वते सम्पदोघाः ॥ १५॥
योगारम्भत्वरितमनसो युष्मदैकान्त्ययुक्तं धर्मं प्राप्तुं प्रथममिह ये धारयन्तेऽधना याम् ॥
तेषां भूमेर्धनपतिगृहादम्बुधेर्वा प्रकामं धारा निर्यान्त्यधिकमधिकं वाञ्छितानां वसूनाम् ॥ १६॥
श्रेयस्कामा यमलनिलये चित्रमाम्नायवाचां चूडापीडं तव पदयुगं चेतसा धारयन्तः ।
छत्रच्छायासुभगशिरसश्चामरस्मेरपार्श्वाः श्लाघाशब्दश्रवणमुदिताः स्रग्विणः सञ्चरन्ति ॥ १७॥
ऊरीकर्तुं कुशलमखिलं जेतुमादीनरातीन् दूरीकर्तुं दुरितनिवहं त्यक्तुमाद्यामविद्याम् ।
अम्ब स्तम्बावधिकजननग्रामसीमान्तरेखामालम्बन्ते विमलमनसो विष्णुकान्ते दया ते ॥ १८॥
जाताकांक्षा जननि युवयोरेकसेवाधिकारे मायालीढं विभवमखिलं मन्यमानास्तृणाय । प्रीत्यै
विष्णोस्तव च कृतिनः प्रीतिमन्तो भजन्ते वेलाभङ्गप्रशमनफलं वैदिकं धर्मसेतुम् ॥ १९॥
सेवे देवि त्रिदशमहिलामौलिमालार्चितं ते सिद्धिक्षेत्रं शमितविपदां सम्पदां पादपद्मम् ।
यस्मिन्नीषन्नमितशिरसो यापयित्वा शरीरं वर्तिष्यन्ते वितमसि पदे वासुदेवस्य धन्याः ॥ २०॥
सानुप्रासप्रकटितदयैः सान्द्रवात्सल्यदिग्धैरम्ब स्निग्धैरमृतलहरीलब्धसब्रह्मचर्यैः ।
घर्मे तापत्रयविरचिते गाढतप्तं क्षणं मामाकिञ्चन्यग्लपितमनधैराद्रियेथाः कटाक्षैः ॥ २१॥
सम्पद्यन्ते भवभयतमीभानवस्त्वत्प्रसादाद्भावाः सर्वे भगवति हरौ भक्तिमुद्वेलयन्तः ।
याचे किं त्वामहमिह यतः शीतलोदारशीला भूयो भूयो दिशसि महतां मङ्गलानां प्रबन्धान् ॥ २२॥
माता देवि त्वमसि भगवान्वासुदेवः पिता मे जातः सोऽहं जननि युवयोरेकलक्ष्यं दयायाः ।
दत्तो युष्मत्परिजनतया देशिकैरप्यतस्त्वं किं ते भूयः प्रियमिति किल स्मेरवक्रा विभासि ॥ २३॥
कल्याणानामविकलनिधिः काऽपि कारुण्यसीमा नित्यामोदा निगमवचसां मौलिमन्दारमाला ।
सम्पद्दिव्यः मधुविजयिनः सन्निधत्तां सदा मे सैषा देवी सकलभुवनप्रार्थनाकामधेनुः ॥ २४॥
उपचितगुरुभक्तेरुत्थितं वेङ्कटेशात्कलि- कलुषनिवृत्त्यै कल्प्यमानं प्रजानाम् ।
सरसिजनिलयायाः स्तोत्रमेतत्पठन्तः सकलकुशलसीमा सार्वभौमा भवन्ति ॥ २५॥
॥ इति श्रीवेदान्तदेशिकाविरचिता श्रीस्तुतिः सम्पूर्णा ॥
ShrI Stuti:
mAnAtIta prathita vibhavAM maNgalaM maNgalAnAM vakshah pIThaM
madhu vijayino bhUshayantIM svakAntyA |
pratyakshAnu shravika mahima prArthinInAm prajAnAm shreyo mUrtim shriyam
asharaNastvAm sharaNyAm prapadye || 1 ||
AvirbhAvah kalasha jaladhA vadhvare vApi yasyAh
sthAnam yasyAh sarasijavanam viShNu vakshah sthalam vA |
bhUmA yasyA bhuvanamah akhilam devi divyam padam vA
stoka praGYairah anavadhi guNA stUyase sA katham tvamah || 2 ||
stotavyatvam dishati bhavatI dehibhiH stUyamAnA
tAmeva tAmah anitara gatiH stotumAshaM samAnaH |
siddhArambhaH sakala bhuvana shlAghanIyo bhaveyam
sevApekshA tava charaNayoH shreyase kasya na syAt.h || 3 ||
yatsankalpAd.h bhavati kamale yatra dehinya mIshhAM
janmasthema pralaya rachanA jaNgamA jaNgamAnAm.h |
tatkalyANaM kimapi yaminAm.h eka lakshyaM samAdhau
pUrNaM tejaH sphurati bhavatI pAda lAkshA rasANkam.h || 4 ||
nishhpratyUha praNaya ghaTitaM devi nityAna pAyaM viShNustvaM
chetyanavadhi guNaM dvandva manyonya lakshyam.h |
sheshhashchittaM vimala manasAM maulayashcha shrutInAM
saMpadyante viharaNa vidhau yasya shayyaa visheshhAH || 5 ||
uddeshyatvaM janani bhajator.h ujjhitopAdhi gandhaM
pratyagrUpe havishhi yuvayor.h eka sheshhitva yogAt.h |
padme patyus.h tava cha nigamair.h nityaman.h vishhyamANo
nAvachchhedaM bhajati mahimA nartayan.h mAnasaM naH || 6 ||
pashyantIshhu shrutishhu paritaH sUri vRindena sArdhaM
madhye kRitya triguNa phalakaM nirmita sthAnabhedam.h |
vishvAdhIsha praNayini sadA vibhrama dyUta vRittau
brahme shAdyA dadhati yuvayoraksha shAra prachAramah || 7 ||
asye shAnA tvamasi jagataH saMshrayantI mukundaM
lakshmIH padmA jaladhi tanayA viShNu patnIndireti |
yannAmAni shruti paripaNAnyevamAvartayanto
nAvartante durita pavana prerite janma chakre || 8 ||
tvAme vAhuH katichi dapare tvatpriyaM lokanAthaM
kiM tairantaH kalaha malinaiH kiMchi duttIrya magnaiH |
tvat.h saMprItyai viharati harau saMmukhInAM shrutInAM
bhAvA rUDhau bhagavati yuvAM dampatI daivataM naH || 9 ||
ApannArti prashamana vidhau baddha dIkshasya vishhNoH
AchakhyustvAM priya sahacharImaikamatyopapannAm.h |
prAdur.h bhAvairapi sama tanuH prAdhvaman.h vIyase tvaM
dUrotkshiptair.h iva madhuratA dugdharA shestaraNgaiH || 10 ||
dhatte shobhAM hari marakate tAvakI mUrtirAdyA
tanvI tuNgastana bharanatA tapta jAmbU nadAbhA |
yasyAM gachchhantyudaya vilayair.h nitya mAnanda sindhau
ichchhA vegollasita laharI vibhramaM vyaktayaste || 11 ||
AsaMsAraM vitatamakhilaM vANmayaM yadvibhUtiH
yad bhrU bhaN^gAt.h kusuma dhanushhaH kiN^karo meru dhanvA |
yasyAM nityaM nayana shatakair.h eka lakshyo mahendraH
padme tAsAM pariNati rasau bhAva leshais.h tvadIyaiH || 12 ||
agre bhartuH sarasija maye bhadra pIThe nishhaNNAm.h
ambho rAsher.h adhigata sudhA saMplavAdutthitAM tvAm.h |
pushhpA sAra sthagita bhuvanaiH pushhkalA varta kaadyaiH
kLiptArambhAH kanaka kalashair.h abhyashhiJNchan.h gajendraaH || 13 ||
Alokya tvAm amRita sahaje viShhNu vakshaHsthalasthAM
shApAkrAntAH sharaNamagaman.h sAvarodhAH surendrAH |
labdhvA bhUyash tribhuvanamidaM lakshitaM tvat.h kaTAkshaiH
sarvAkAra sthira samudayAM saMpadaM nirvishanti || 14 ||
Arta trANa vratibhirhamRitA sAra nIlAmbuvAhaiH
ambhojAnAm.h ushhasi mishhatAm.h antaraNgair.h apANgaiH |
yasyAM yasyAM dishi viharate devi dRishhTishtvadIyA
tasyAM tasyAmaham.h ahamikAM tanvate saMpadoghAH || 15 ||
yogArambha tvarita manaso yushhmadai kAntya yuktaM
dharmaM prAptuM prathamamiha ye dhArayante dhanAyAm.h |
teshhAM bhUmer.h dhanapati gRihAd.h ambarAdambudhervA
dhArA niryAnt.h yadhika madhikaM vAJNchhitAnAM vasUnAm.h || 16 ||
shreyas.h kAmAH kamala nilaye chitra mAmnAya vAchAM
chUDA pIDaM tava pada yugaM chetasA dhArayantaH |
chhatra chchhAyA subhaga shirasash.h chAmara smera pArshvAH
shlaaghaa shabda shravaNa muditaaH sragviNaH saJNcharanti || 17 ||
UrIkartuM kushalam.h akhilaM jetumAdInarAtIn.h
dUrI kartuM durita nivahaM tyaktum.h AdyAma vidyAm.h |
amba stamba avadhika janana graama siimaanta rekhaam.h
Alambante vimala manaso viShhNu kAnte dayAM te || 18 ||
jAtA kANkshA janani yuvayor.h eka sevAdhi kAre
mAyA lIDhaM vibhavam.h akhilaM manya mAnAs.h tRiNAya |
prItyai viShhNostava cha kRitinaH prItimanto bhajante
velAbhaNgaH prashamana phalaM vaidikaM dharmasetum.h || 19 ||
seve devi tridasha mahilA mauli mAlArchitaM te
siddhi kshetraM shamita vipadAM saMpadAM pAda padmam.h |
yasmin.h nIshhan.h namita shiraso yApayitvA sharIraM
vartishhyante vitamasi pade vAsudevasya dhanyAH || 20 ||
sAnuprAsa prakaTita dayaiH sAndra vAtsalya digdhaiH
amba snigdhair.h amRita laharI labdha sa brahmacharyaiH |
gharme tApa traya virachite gADha taptaM kshaNaM mAm.h
AkiJNchanya glapita managhair.h ArdrayethAH kaTAkshaiH || 21 ||
saMpadyante bhava bhaya tamI bhAnavas.h tvat.h prasAdAt.h
bhAvAH sarve bhagavati harau bhakti mudvelayantaH |
yAche kiM tvAm.h ahamiha yataH shItalodAra shIlA
bhUyo bhUyo dishasi mahatAM maN^galAnAM prabandhAn.h || 22 ||
mAtA devi tvamasi bhagavAn.h vAsudevaH pitA me
jAtaH so.ahaM janani yuvayor.h eka lakshyaM dayAyAH |
datto yushhmat.h pari jana tayaa deshikair.h apyatastvaM
kiM te bhUyaH priyamiti kila smera vaktrA vibhAsi || 23 ||
kalyANAnAm.h avikala nidhiH kA.api kAruNya sImA
nityAmodA nigama vachasAM mauli mandAra mAlA |
saMpad.h divyA madhu vijayinaH sannidhattAM sadA me
saishhaa devii sakala bhuvana praarthanaa kaamadhenuH || 24 ||
upachita guru bhakter.h utthitaM veN^kaTeshAt.h
kali kalushha nivR^ittyai kalpamAnaM prajAnAm.h |
sarasija nilayAyAH stotram.h etat.h paThantaH
sakala kushala sImAH sArva bhaumA bhavanti || 25 ||